५ पुस, काठमाडौं । वीरगञ्जमा बिहीबार सुरु भएको प्रो क्लब च्याम्पियनसिप क्रिकेटको विभागीय डर्बीमा त्रिभुवन आर्मी क्लबले नेपाल पुलिस क्लबलाई ८ विकेटले पराजित गरेको छ ।
वीरगञ्जको नारायणी रंगशालमा भएको खेलमा पुलिसले दिएको ५९ रनको सामान्य लक्ष्य आर्मीले ६.१ ओभरै २ विकेट गुमाएर पूरा गर्यो । आर्मीका लागि रोहित पौडेलले १४ बलमा सर्वाधिक २१ रन बनाए । नटआउट रहेका उनले १ चौका र २ छक्का प्रहार गरे ।
यस्तै ओपनर सन्तोष कार्कीले ११ बलमा २० रन जोडे । कप्तान विनोद भण्डारीले ११ बलमा नटआउट १४ रन बनाए । कुशल मल्ल २ रनमा आउट भए ।
पुलिसका लागि ललित राजवंशीले एक विकेट लिए ।
टस हारेर पहिले ब्याटिङ गरेको पुलिसले आर्मीको स्पिनरहरु सामु खुलेर खेल्न नसक्दा १८.४ ओभरमा सबै विकेट गुमाएर ५८ रनमै अलआउट भयो ।
पुलिसका लागि नवौँ नम्बरमा ब्याटिङ गरेका करण केसीले सर्वाधिक १५ रन बनाए । उनले १६ बल खेल्दा १ छक्का प्रहार गरेका थिए । त्यो नै पुलिसको इनिङ्सको एक मात्र बाउन्ड्री थियो । पुलिसले अतिरिक्तबाट पनि १५ रन पाएको थियो ।
अमित श्रेष्ठले ११ रन जोडे । बाँकी खेलाडीले दोहोरो अंकमा रन जोड्न सकेनन् ।
पुलिसलाई अलआउट गर्न आर्मीका स्पिनर मिलेर ६ विकेट लिए । जसमा शहाब आलमले ४ ओभरमा २ मेडन राख्दै ४ रन मात्र खर्चेर ३ विकेट लिए । यस्तै बसिर अहमदले ४ ओभरमा १२ रन खर्चेर २ तथा कुशल मल्लले ४ ओभरमा २ मेडन राख्दै ८ रन खर्चेर १ विकेट लिए ।
सोमपाल कामी र अविनाश कर्णले समान १ विकेट लिए ।
जोरा इन्टरनेशनलले पर्सा जिल्ला क्रिकेट संघसँगको सहकार्यमा आयोजना गरेको प्रो क्लब च्याम्पियनसिपमा नेपालमा ४ र भारतका दुई गरी ६ टोलीको सहभागि छ ।
सिंगल राउण्ड रोविन लिगका आधारमा हुने प्रतियोगितामा शीर्ष चार टोली सेमिफाइनल प्रवेश गर्नेछन् ।
प्रकाशित मिति: २०२३-१२-२४ , समय : १९:२०:०३ , १२ महिना अगाडि
