विराटनगर : कोशी प्रदेश खेलकुद विकास बोेर्डका सदस्य सचिव कृष्ण बस्नेत ( पर्शुराम ) ले जिल्ला खेलकुद विकास समिति ताप्लेजुङको प्राङ्गणमा निर्मित कभर्ड हलको निरीक्षण गर्नु भएको छ । आज बस्नेतले ताप्लेजुङ स्थित जिल्ला खेलकुद विकास समितिको कार्यलय तथा कभर्ड हल अनुगमन तथा निरीक्षण गर्नु भएको हो ।
जिल्ला खेलकुद विकास समिति कार्यलय तथा कभर्ड हलको अनुगमन तथा निरीक्षण गर्दै बस्नेतले जिल्लामा विभिन्न खेलका खेलाडी तथा प्रशिक्षकको अवस्थाको बिषयमा जानकारी लिनु भएको खेलकुद विकास बोर्डका कार्यलय प्रमुख कालिदास भट्टराईले जानकारी दिनु भयो ।
भट्टराईका अनुसार सदस्य सचिव बस्नेतले जिल्लामा खेलकुदको अवस्था लगायत दशौं राष्ट्रिय खेलकुद प्रतियोगिताका लागि जिल्लाको तयारी तथा विभिन्न खेलका खेलाडीहरू लगायतको जानकारी लिनु भएको बताउनु भयो ।
जिल्ला खेलकुद विकास कार्यलय ताप्लेजुङका कार्यलय प्रमुख यज्ञनिधि पौडेले सदस्य सचिव बस्नेतलाई कार्यलय प्राङ्गणमा निर्माणाधीन कभर्ड हलको अवस्था तथा दशौं राष्ट्रिय खेलुकद प्रतियोगिताका लागि जिल्लाको तयारीको बिषयमा जानकारी गराएको बताउनु भयो ।
प्रकाशित मिति: २०२४-१०-२५ , समय : २२:२३:१६ , २ महिना अगाडि
