नेकपा एमाले झापाको तेस्रो पूर्ण बैठक सम्पन्न भएको छ ।स्थायी कमिटी सदस्य एवम् कोशी प्रदेश कमिटी इञ्चार्ज शेरधन राईको प्रमुख आतिथ्यता तथा जिल्ला पार्टी अध्यक्ष प्रेम गिरीको अध्यक्षतामा बैठक भएको हो ।
बैठकले पार्टीको मिसन २०८४ लाई केन्द्रित गरी जिल्ला पार्टीका नेताहरूको कर्यविभाजन गरेको छ । पार्टीले एक वर्षभरी गर्ने कामको वार्षिक कार्ययोजना पनि बनाएको छ । त्यसको लागि आवश्यक पर्ने बजेटसमेत बैठकले बनाएको नेकपा एमाले झापाले जनाएको छ ।
नेकपा एमाले केन्द्रीय सदस्य एवं झापा जिल्ला इञ्चार्ज रोमनाथ ओली, कोशी प्रदेशका अध्यक्ष घनश्याम खतिवडा लगायतको उपस्थितिमा भएको बैठकले पार्टीका अभियानलाई व्यवस्थित रूपले अघि बढाउने निर्णय गरेको छ ।
कार्यक्रममा बोल्दै एमाले स्थायी कमिटी सदस्य शेरधन राईले अबको पार्टीको लक्ष मिसन २०८४ भएकोले त्यसलाई केन्द्रमा राखेर पार्टीको अभियान अघि बढाउन निर्देशन दिए । उनले सिङ्गो पार्टी पङ्तीलाई एक जुट भएर २०८४ सालको निर्वाचनमा तीनवटै तहमा नेकपा एमालेलाई बहुमत सहितको पहिलो दल बनाउने गरी लाग्न आग्रह गरे ।
बैठकले अन्य पार्टीबाट समायोजन भए आएका सहित केही नेताहरूलाई जिल्ला कमिटी सदस्यमा मनोनीत गरेको छ । त्यस्तै ११ जना जिल्ला कमिटी सदस्यलाई सचिवालय सदस्यमा मनोनीत गरेको छ ।आजकै बैठक निर्वाचन क्षेत्र नं ५ ख मा बोधराज न्यौपानेको संयोजकत्वमा निर्वाचन क्षेत्रस्तरीय कमिटी गठन गरेको छ ।
बैठकमा पार्टी उपाध्यक्ष शिव ढुङ्गेलले बैठकको आचारसंहिता प्रस्तुत गरेका थिए भने कार्यालय सचिव छविलाल विश्वकर्माले करिब ५ करोड ५० लाख रुपैँया बराबरको वार्षिक आम्दानी र खर्चको अनुमानित विवरण प्रस्तुत गरेका थिए ।
प्रकाशित मिति: २०२४-०८-२२ , समय : ०९:०१:४७ , ४ महिना अगाडि
