कृषि तथा पशुपन्छी विकासमन्त्री रामनाथ अधिकारीले कृषि मन्त्रालयबाट ठूलो रकम अनुदान लगेर काम नगर्नेहरूको सूची सार्वजनिक गर्ने चेतावनी दिएका छन्।
मन्त्रालयमा आज सञ्चारकर्मीसँग उनले भने, “कृषि मन्त्रालयले पछिल्लो ५/७ वर्षमा अर्बौं रुपैयाँ अनुदान दिएको रहेछ। सबै विवरण सार्वजनिक गर्नुपर्छ भनिसकेको छु। केही दिनमा यो सार्वजनिक हुन्छ।”
आफूले मन्त्रालय सम्हाल्दा कर्मचारी आन्दोलनदेखिका यावत समस्या रहेको चर्चा गर्दै उनले दुग्ध किसानको वक्यौतादेखि उखु किसानको पैसा दिने गरी काम गरिरहेको दावी गरे।
मन्त्री अधिकारीले आफूले मन्त्रालयको जिम्मेवारी सम्हालेपछि २५ करोड रुपैयाँ दूग्ध किसानको हातमा गइसकेको जानकारी दिए।
डेढ अर्ब रुपैयाँ किसानलाई तिर्न बाँकी रहेको जनाउँदै उनले भने, “बाँकी रकम पनि निकासाका लागि प्रयास भइरहेको छ। उखु किसानलाई गत वर्षको भुक्तानी दिन नसक्ने हो भने दशैँको वेलामा जुलुस निस्कँदै छ‚ त्यो पनि जानकारी छ। रकम निकासाका लागि प्रयास गरिरहेको छु।”
मन्त्री अधिकारीले कृषि मन्त्रालय र असली किसानको बीचमा ठूलो खाडल रहेको र त्यसलाई कसरी पुर्ने भनेर आफू लागि परेको बताए।
फरक प्रसङ्गमा उनले राजनीतिक दलप्रति जनताको वितृष्णा रहेको स्वीकार्दै नेपाली कांग्रेस र नेकपा एमालेको वर्तमान गठबन्धनले जनतामा उत्साह जगाउने गरी काम गर्नुपर्ने र गर्ने बताए।
“राज्यप्रति जनताको भरोसा टुटेको छ, त्यसमा उत्साह जगाउन सबैले भूमिका खेल्नुपर्नेछ”, उनले भने, “जिम्मेवारीबाट भाग्न सकिने अवस्था छैन‚ भागिँदैन।”
आफूबाट कुनै गल्ती गरे र भए सञ्चारमाध्यम र सञ्चारकर्मीले औँल्याइदिन आग्रह गर्दै मन्त्री अधिकारीले त्यसलाई आफूले सकारात्मक रुपमा ग्रहण गर्ने प्रतिबद्धता पनि व्यक्त गरे।
प्रकाशित मिति: २०२४-०८-२१ , समय : ०७:४६:४८ , ५ महिना अगाडि
