विराटनगर : नेपाल खेलकुद महासंघ विराटनगर महानगरपालिका कमिटीको सप्ताहव्यापी वृक्षारोपन कार्यक्रम सम्पन्न भएको छ । साउन २२ गते बाट सुरू भएको महासंघको सप्ताहव्यापी वृक्षारोपन कार्यक्रम आज सम्पन्न भएको हो ।
महासंघ महानगर कमिटीका अध्यक्ष जतिन ताम्राकारले विराटनगर महानगरपालिका वडा नं १ बाट सुरू गरिएको वृक्षारोपन कार्यक्रम वडा नं २ , ३ , ४ , ५ र १९ मा गरि सम्पन्न गरिएको जानकारी दिनु भयो । ताम्राकारले पहिलो चरणको कार्यक्रममा महानगरको ६ वटा वडामा वृक्षारोपन गरिएको र दोस्रो र तेस्रो चरणमा गरेर महानगरको १९ वटै वडामा वृक्षारोपन गर्ने तयारी रहेको बताउनु भयो । महासंघले नेपाल फुलवारी वेष्ट थ्री आर पोल्युसन कन्टोर्ल सर्विस प्रा. लि. र विराटनगर महानगरपालिकासँगको सहकार्यमा वृक्षारोपन कार्यक्रम सम्पन्न गरेको हो ।
नेपाल खेलकुद महासंघका केन्द्रीय अध्यक्ष तथा कोशी प्रदेश खेलकुद विकास बोर्डका सदस्य सचिव कृष्ण ( पर्शुराम ) बस्नेतले महासंघको केन्द्रीय नीति ‘ एक कमिटी , एक रचनात्मक गतिविधि ‘ अनुरूप महानगर कमिटीले गरेको वृक्षारोपन कार्यक्रमले समाजमा सकारात्मकता सञ्चार गरेको बताउनु भएको थियो । बस्नेतले नेपाली समाजमा देखिएको नकारात्मकतालाई परास्त गर्न युवाहरूले नै अघि बढे मात्र सम्भव हुने भन्दै अगामी दिनमा समेत रचनात्मक कार्य गर्न महानगर कमिटीलाई निर्देशन दिनु भएको थियो ।
महासंघ स्थायी कमिटी सदस्य तथा विराटनगर महानगर इञ्चार्ज मनोज विक्रम शाहले वृक्षारोपन कार्यक्रमसँगै महासंघले विराटनगरलाई खेलमय बनाउने योजना साथ अघि बढ्ने प्रष्ट पार्नु भएको थियो । महासंघ महानगर कमिटीले छिट्टै वडा स्तरीय फुटबल प्रतियोगिता , खुला टेबल टेनिस प्रतियोगिता , टि-टेन क्रिकेट प्रतियोगिता गर्ने तयारी समेत गरिरहेको शाहले जानकारी दिनु भयो ।
प्रकाशित मिति: २०२४-०८-१२ , समय : २१:२०:२४ , ४ महिना अगाडि
